ووصاير في البحرين ووصاير؟؟؟؟

من حق كل هذا الشعب أن يقف مستنكرا و متسائلا بصوت واحد (ووصاير في البحرين ووصاير)؟ هل هذه هي البحرين التي عرفناها و عشنا فيها طول العمر؟ و إن كانت هي فهل هي لعنة أصابتها و غيرت كل حالها، أم هي عين ما صلت على النبي؟ فجأة و دون سابق إنذار، ها هي الفضائح تملأ فضاء الوطن من كل حدب و صوب.

وصصاير في البحر؟

 ها هي البحار كلها استحالت أملاكا خاصة و مناطق سكنى و مزارع لها بداية و ليس لها أي نهاية، و صار أهلها و محبوها و المقتاتون عليها محرومون منها، بل و ممنوعون من الوصول إليها. فتكون هناك فضيحة تلف كل بحر و ساحل.

وصصاير في البر؟

ما ظلت نتفة أرض إلا استولوا عليها ، لين صارت الناس تلاهف ما عندها بقعة تشتريها لو تبني عليها؟ برووور ويش كبرها ممنوع الدخول فيها و ممنوع الاقتراب منها، و جزر في كل زاوية من زوايا البحر ما ندري عنها. حاطين كل قوتهم على لبحور يدفنونها،،، ووصصاير يعني ووصصاير؟؟

وصصاير في الجو؟

وصصاير في الجو ما ظلت تذكرة على حالها؟ الواحد لين ضاقت به الدنيا وين يروح يعني؟ إيران صارت أغلى من لندن؟ لو الي بيروح الحج ماتسوى عليه يبي له قرضة؟ لو يجوز بعد قلنا ما عليه ، نتعصلق و نروح ، لويش يعني هالعمايل؟

وصصاير في الحكومة؟

وصصاير في الحكومة ما خلوتون وزير في مكانه؟ الحين ما ظلت إلا على أولاد الملحة تشولونهم؟ الحين هالفضيحة من وين تقابلونها ؟ معقولة عاد أولاد الملحة شاحنين البلد و تالي ما في واحد منهم في منصب عدل؟ عيب عليكم لاه.

 

 

وصصاير في التربية؟

ووصصاير في وزير التربية ما ظل منتوف في بقعة من العالم إلا تعاقد معاه و شغله و اولاد البلد ماليهم شغل؟ السنة بروحها اللي توظفوا من الخارج فوق الـ600؟؟؟ و البحريني اللي يشتغل ما ظل شرط إلا حطوه في وجهه بس حتى ما يشغلونه؟ من زينها وزارة يعني؟؟

 

وصصاير في الداخلية؟

وصصاير في الداخلية مو عارفين شلون يطلعون روحهم من سالفة مجوودي؟ الحين عازتكم يعني تعدلون عنوان الوفاة؟ لو المنتج نسى يعدل هالمشهد يعني؟ خلاص مو حلوة تكملون المسلسل صار ممل و نهاية معروفة. جهزوا روحكم من وقت لرمضان الجاي.

وصصاير في الكهرباء؟

وصصاير في الكهرباء يعني ويش سالفتكم؟ الحين تغمضون عيونكم عن المجمعات و الشركات و المؤسسات و الوزارات و القصور مال فلان و علان الي ما ينطرون، و حاطين عويناتكم على بيوت الفقاره؟ ما صار هذي خمسين دينار يعطونا اياها كل شهر؟ ليش يعني اللي يزيد بيله عن 50 دينار تقطعون الكهربه عنه؟ ليش يعني؟ تقدرون تطلعون لي بيل كهربه مال قصر واحد من هالشيوخ يعني؟ لو بس احنا الي ابيالتنا حمره؟ لا و من زين كهربتكم مو كأنها طول الصيف مقطوعة.

وصصاير في الشوارع؟

وصصاير في الشوارع ما كو شارع صاحي في حاله؟ تاخذه من دوار مدينة  عيسى لو من اشارة الخارطة؟ لو تاخذها من جسر سترة لو من شارع السهلة؟ ما خلوتون شارع في حاله إلا حفرتونه و بعفرتونه؟ بسكم له، ندري ليكم نسبة في كل هالمقاولات اللي تشتغل بس خلونا نروح اشغالنا براحة عاد.

وصصاير في المطاعم؟

وصصاير في المطاعم؟ الحين مستخسرين علينا بارسل الغداء كان بست ربيات الحين رفعتونه إلى تسع ربيات، من حلاوته غداء عاد. لو لبروستد الي متعكزين عليه رفعتون سعره الى دينار و نص؟ ووصاير بعد في البرقر كل ما ليكم تصغرونها و تشرحونها اكثر؟ صغرتونها كفاية بعد تقصونها بالنص و تشرحونها من الوسطة ليش يعني؟ اذا ما ليكم نفس تحطون برقر لا تحطون بس حطو لينا الدهن مال القلاية؟ كلشي عاد و لا ورق العنب هالبايخ، ليش يعني البارسل بسبع ربيات؟ تطلع على الواحد الصبعة بربية و ربع؟

وصصاير في المخابز؟

وصصاير في المخابز كل ما ليهم يصغرون الروتية؟ من قبل الواحد ياكل روتية تطفح له اللقمة الحين ياكل كيس كامل يادوب تكفيه. و الخبابيز وصصاير فيهم بعد كلما يجي ليه القرص يصغر و يضعف؟ حتى الواحد ما يمديه يتسلى بالخبز صاير كأنه كلينس من رقاقته؟ بعد ويش بقى للفقارة في هالديرة يعني؟

 

Advertisements

الأوسمة:

رد واحد to “ووصاير في البحرين ووصاير؟؟؟؟”

  1. صاحب الكرامة Says:

    لن تحصد قمحاً إن زرعت شعيراً

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: